پرڏيهي پاليسيءَ جي ڇيدڪاريءَ سان لاڳاپيل هي اصطلاح مُختلف حالتن ۾ گهيريل فيصلي ساز عمل ۽ اڻ سُوجهيل نفسياتي وارتائن جي وچ ۾ موجود تفاوتن کي ظاهر ڪري ٿو، ”اڻ سوُجهيل وارتائون“ دراصل اُهو ماحول آهي، جيڪو فيصلي ڪرڻ/ ٿيڻ دوران فيصلي ڪندڙ ڌُر مٿان حاوي هُجي ٿو. هي تصور سڀ کان اڳ آمريڪا جي سياسي جاگرافي دانن ’هيرالڊ‘ ۽ ’مارگريٽ‘ 1956ع ۾ هڪ مضمون ۽ 1965ع ۾ لکيل ڪتاب منجهه ڏيئي جاگرافيائي پوزيشن جي اهميت توڙي بين الاقوامي معاملن ۾ ٿيندڙ سرگرمين جي حوالي سان هڪ ”اضافي حقيقت“ طور ڏنو. هن اصطلاح جي بهترين وضاحت ڪنهن به نيتي جوڙيندڙ (Policy Maker) جي چوڌاري حالتن جو احاطو ڪرڻ سان ٿي سگهي ٿي، جن حالتن مطابق هُو ڇا ڪري سگهي ٿو ۽ ڇا نٿو ڪري سگهي، وارا پهلو ڳڻپ ۾ ايندا آهن. جيتوڻيڪ ان نفسياتي وارتا کي فيصلي تي عمل ڪرڻ دوران محسوس نٿو ڪري سگهجي، پر ان جو اثر (Impact) ماحول ۾ محسوس ضرور ڪري سگهجي ٿو. ڪنهن به ڪيل فيصلي جا عوامي حلقن ۾ اثر ۽ انهن اثرن جي نتيجي ۾ پيدا ٿيندڙ بُحران يا مليل حمايت وارا پهلو واضح ڪندا آهن ته فيصلي ڪندڙ جو ادراڪ ۽ سمجهه ڪيتري قدر دُرست يا غلط آهي .